O BNG presenta unha proposición non de lei para mellorar a seguridade dos peóns no acceso ao centro médico do Souto de Vea

O Centro Médico do Souto de Vea, ao que acoden un número importante de veciños e veciñas do Val do Vea, está situado ás aforas do Souto de Vea, ao outro lado da PO-841, que une Santiago e A Estrada, unha estrada con un grande tráfico viario a todas as horas do día.

Os pacientes que acoden diariamente a este centro médico son na súa meirande parte xente maior, que a diario ten que cruzar a PO-841, sen que haxa sequera un paso de peóns. Isto provocou a morte dunha persoa que foi atropelada cruzando este vial en dirección ao centro de saúde. A morte deste veciño provocou unha fonda indignación entre a veciñanza, que se mobilizou na procura de melloras para a súa seguranza. En reiteradas ocasións houbo declaracións de intencións para mellorar este acceso, mais dous anos despois nada se sabe.

Deste xeito o BNG presenta no Parlamento Galego unha proposición non de lei para o seu debate e aprobación en Comisión, na que insta á Xunta de Galiza a adoptar de xeito urxente, e neste mesmo ano, as medidas que se precisen co fin de protexer aos veciños e veciñas do Val de Vea, que todos os días teñen que cruzar a estrada de titularidade autonómica PO-841 (Santiago-A Estrada) para achegarse ao Centro Médico de Souto de Vea, co fin de evitar novos atropelos.

Notas:
Adxuntamos a Proposición non de Lei presentada hoxe.

Desde o mes de outubro véñense sucedendo unha serie de obras no Centro de 3ª Idade da Estrada o que está a provocar graves problemas aos residentes como durmir acinados, frío, sucidade, choiva,... e toda unha serie de inconvenientes provocados polas obras que teñen lugar nun tempo, o outono, pouco propicio para levalas adiante cos menores problemas para os residentes.

No BNG cualificamos de indigna esta situación para os residentes do Centro. E por este motivo, a través da deputada do BNG Teresa Táboas, presentamos unha pregunta parlamentar para saber que planificación fixo o goberno do PP para levar adiante estas obras.

O Consello Nacional do BNG, reunido hoxe sábado en Santiago, nomeou a Raquel López Doce, Responsábel da Comisión Nacional de Servizos Sociais.

Estas Comisións Sectoriais do BNG están creadas para debater e definir propostas de políticas temáticas que deba desenvolver o BNG na súa acción política, contribuíndo á elaboración, unificación e homologación da política do BNG neste eido.

O cargo de Responsábel da Comisión Nacional de Servizos Sociais, ten cecais, un plus engadido de responsabilidade, xa que a área temática desta comisión afecta a unha das áreas de responsabilidade do BNG no Goberno da Xunta, concretamente na Vicepresidencia da Igualdade e do Benestar.

Recordar que Raquel López Doce, Candidata do BNG á Alcaldía, é Diplomada en Traballo Social, e experta en Xerencia de Servizos Sociais e profesionalmente é Traballadora Social na atención primaria municipal, polo que o dominio nesta área está sobradamente garantido.

O PP ven de rexeitar no pleno celebrado onte a súa entrada no Consorcio Galego de Servizos de Igualdade e Benestar para a colaboración na xestión dos servizos sociais no ámbito territorial dos concellos galegos. É dicir, que a Xunta faríase cargo de servizos que agora mesmo paga o xa excesivamente endebedado do noso Concello, como por exemplo a Gardería Municipal, que é xestionado por unha empresa privada e cuxa directora pasará a formar parte da plantilla do Concello. Neste sentido, na mesma moción, solicítase a paralización do proceso selectivo para a dotación da praza de Directora da EIM e amortizala no Cadro de Persoal do ano 2007.

Raquel López Doce denunciou que existe unha estratexia do PP de boicotear este Consorcio, como aconteceu co convenio das brigadas municipais anti-incendios.

O PP quería as probas e o BNG rexistrou no Concello as probas do delito, que demostran, sen lugar a dúbidas que a decisión de non construír o centro médico do Foxo foi unha decisión tomada polo PP, plasmada nos diarios de sesións do Parlamento, na que ano tras ano, rexeitaban as emendas presentadas polo BNG para que este centro fora unha realidade. O BNG tamén lle remitiu ao PP por correo a mesma documentación rexistrada no Concello, para evitar que logo saian nos medios de comunicación presentando unha documentación pretendendo manipular a opinión pública

Nas ligazóns que figuran na seguinte táboa aparecen as emendas presentadas polo BNG a respecto da construción do centro médico do Foxo, así como o resultado das mesmas, é dicir, o rexeitamento sistemático das mesmas nos orzamentos dos anos 2002, 2003 e 2005.

O BNG denuncia que o PP está a facer un uso partidista e propagandístico deste problema, e tendo os mecanismos que ten o Grupo de Goberno a súa disposición non moveron un dedo para evitar que a decisión do Sergas de eliminar o centro médico Foxo. Ademais deste uso propagandista o BNG pensa que o Sr. Palmou, deputado do PP nas lexislaturas anteriormente citadas, xogou un papel protagonista no rexeitamento das emendas do BNG, nas que se incluía a construción do cento médico, e non pode vir agora como valedor do pobo da Estrada, cando foi el e os deputados do PP no Parlamento, así como os seus compañeiros no goberno, os que impediron que o Foxo teña hoxe un centro médico en condicións. O BNG non lle vai a pedir a súa dimisión, por faltar a verdade e por manipular aos veciños e veciñas do Foxo, pero serán os electores e os votantes do Partido Popular na Estrada os que evitarán que volte saír eleito deputado nas vindeiras eleccións galegas.

O PP presentou onte unha moción na que instaba á Xunta á construción do centro médico do Foxo, logo de que os veciños e veciñas do Foxo saíran á rúa para protestar pola decisión de suprimir este centro. Mais o PP, que a priori presentaba esta moción coa pretensión de deixar en evidencia ás forzas políticas que sustentan o bipartito na Xunta, nomeadamente ao PSOE, por ser este partido o responsábel da Consellaría de Sanidade, saiulle o tiro pola culata, pois o BNG denunciou que a decisión de suprimir o centro médico do Foxo foi tomada polo Partido Popular; primeiro no Goberno, suprimindo de raíz este centro médico no mes de marzo de 2005, e logo rexeitando no parlamento por dous anos consecutivos as emendas do BNG aos orzamentos da Xunta relativas á construción do devandito centro médico.

Raquel López, portavoz Municipal do BNG, destacou o cinismo e a demagoxia do PP nun tema do que tiñan que ser coñecedores, pois o seu partido levaba gobernando na Xunta 16 anos, non movendo un dedo para que o centro médico do Foxo fora unha realidade, e cando xa non hai remedio, non dubidan en colocarse detrás da pancarta, mentindo e manipulando descaradamente aos veciños.

Malia todo, a moción que presentou o BNG, na que se instaba á Consellería de Sanidade e ao SERGAS a reconsiderar a decisión adoptada pola anterior administración do Partido Popular e solicitarlle que, dada a necesidade deste Centro, a modifique e volva a incluír a este Centro Médico na súa Planificación, á maior brevidade, contou cos votos favorábeis do PP, probabelmente por non quedar en evidencia, aínda máis, diante dos veciños e veciñas que se congregaron no salón de Plenos.