Unha representación dos viciños e viciñas pechados desde o día 19 de decembro no Concello, xunto co Deputado Bieito Lobeira, entrevistarán-se, mañá luns 29 de decembro, co Valedor do Povo, Sr. José Ramón Vázquez Sandes, para expor-lle unha queixa sobre a situación que están a sofrer por parte do Alcalde

AO VALEDOR DO POBO, SR. D. JOSÉ RAMÓN VÁZQUEZ SANDES

A "Asemblea de afectados e afectadas pola suba desproporcionada do IBI na Estrada" pechados na Casa do Concello desde as 14 horas do venres 19 de decembro, quere pór no seu coñecemento os seguintes feitos:

No ano 1996 foi actualizada a "Ponencia de Valores Catastrais", a mesma ademais de supor un incremento superior ao 300 % nos recibos presentaba diversos problemas sendo o máis grave o da sobrevaloración de numerosos inmobles sobre todo os do casco urbano do Concello, e foi asinada e avalada unicamente polo xa Alcalde, Sr. Ramón Campos Durán, sen trámite plenario ningún. Diante disto a veciñanza mobilizouse, criando unha Plataforma coa presión da que se conseguíu que o problema se tratara en Pleno e se adoptaran os acordos de reducción e mantemento do tipo no 0,2 % mentras se realizaba a revisión da nomeada Ponencia. Van alá 7 anos e o acordo plenario de 1996 foi doblemente incumprido, xa que en 1999 houbo unha suba do tipo ao 0,25 % sen que a Ponencia de Valores fora revisada, e, a propia Xerencia do Catastro non fixo máis que pór impedimentos e atrancos a aqueles veciños que trataron de corrixir os erros de forma individual en todo este período.

En Xullo de 2003 aprobouse no Pleno da Corporación a nova Ordenanza do IBI, a mesma inclúe bonificacións para todo o rural estradense e non inclúe ningunha medida que palie o problema na Vila, varios veciños presentaron reclamacións á ordenanza pero non foron tidas en conta (foron rexeitadas polos 12 edís do PP e os 5 do PSOE), e dado que a suba de 2002 a 2003 supón un incremento de máis do 60 % nos recibos, os veciños afecados pola suba comenzamos a mobilizarnos a finais do mes de novembro. Realizamos unha recollida de sinaturas demandando unha solución antes do día 22 de decembro, data na que finalizaba o período de pago voluntario dos recibos; foron presentadas a través do Rexistro Xeral do Concello un total de 1.665 sinaturas á par que o Grupo municipal do BNG demandaba que o asunto se incluíse na Orde do día do seguinte Pleno que tería que ter lugar o segundo luns do mes de decembro, isto é o día 8. Ese día foi festivo e o Pleno ordinario non foi convocado. A moción presentada polo BNG foi estudada pola Comisión Municipal de Facenda que dictaminou favorablemente a convocatoria dun Pleno, se ben se pronunciou en contra das alternativas propostas como solución á suba da contribución. O venres 19 de decembro unha representación de máis de 100 afectados decidimos pechármonos no Concello en demanda da convocatoria dun Pleno no que se tratara o problema do IBI, no día de hoxe, cumpridas as 200 horas de peche ininterrompido o Alcalde continúa sen convocar o Pleno, e máis aínda anunciando na prensa que non pensa convocalo, facendo público así que se nega a acatar e cumprir a lexislación que na recente toma de posesión como Alcalde do noso Concello xurou cumprir e facer cumprir. Considera o Sr. Campos que a obtención da maioría absoluta o faculta para facer e desfacer á súa vontade, o exime do cumprimento da lei e de escoitar e atender as demandas veciñais.

Por iso, formulamos ante Vde. as seguintes QUEIXAS:

- O Alcade da Estrada négase publicamente a cumprir a normativa de réxime local e anuncia que non vai convovar ningún Pleno no mes de decembro (obrigado nos Concellos de máis de 20.000 hab. coma o noso)

- O Alcalde e os Grupos municipais do PP e do PSOE tratan de forma discriminatoria aos propietarios de bens inmobles, ao buscar unha solucion para os do rural e negárllela aos da vila, máis afectados pola suba ao estar peor feita neste caso a vixente Ponencia de Valores Catastrais.

O Alcalde da Estrada négase a buscar unha solución ao problema xerado por el ao incumprir o Acordo Plenario de 1996 en base ao cal antes de 2003 tiña que estar feita e aprobada unha nova e corrixida Ponencia de Valores Catastrais, e

-O persoal da Xerencia Provincial de Catastro tratou de forma inaxeitada neste período aos veciños e veciñas que a este organismo se dirixiron para tratar de corrixir distintos erros referidos aos seus inmobles, nomeadamente no referido as valoracións dos mesmos, obrigandoos a realizar numerosas e infructuosas viaxes para recibir un trato denigrante, na vez dunha atención respectuosa e eficiente, á que consideramos ten dereito todo cidadán diante da administración.

Escreber Comentario
Nome:	Visitante
Título:
Comentario:

Powered by AkoComment 1.0 beta 2!