1º O Bloque Nacionalista Galego non arremete nin arremeterá contra os emigrantes e fixo da loita contra a emigración e marxinación dos nosos emigrantes unha das suas bandeiras, tal foi así no nacionalismo galego en toda a sua historia desde Castelao ata a actualidade.

2º Si existiu e existe emigración non é porque Galiza sexa pobre nin é por responsabilidade dos nacionalistas que ata agora nunca gobernaron a nosa terra, senón por culpa dos que si o fixeron e que hoxe se pasean arrecadando os votos dos que expulsaron noutrora fóra do país coa sua política económica e social de marxinación do noso país. Ou pensa alguén que se aquí houbese emprego e condicións dignas de vida a xente tería deixado a sua familia e amigos marchando cara un mundo incerto.

3º A política de atención á emigración é competéncia da Xunta (Consellería de Emigración) e non dos Concellos que teñen outras responsabilidades que non poden deixar de atender. Desde os Concellos é imposible solucionar ningunha das necesidades que teñen os emigrantes en canto a servicios sociais, sanidade, emprego, vivenda, retorno, etc... e nese sentido o BNG ten presentado iniciativas para que así sexan resoltas por quen lle compete.

4º Tamén os Concellos poden colaborar en paliar os problemas que padecen nosos irmáns no exterior e contribuír economicamente cos seus centros de emigrados, pero consideramos que debe haber un sistema obxectivo e transparente para canalizar esas axudas. Nada diso é o que fai o alcalde da Estrada tal como se desprende do informe negativo de intervención polo seu donativo de 2 millóns de pesetas, que non cumpre as mínimas garantías e a palabra do sr. Alcalde non abonda. Os emigrantes debían ser os primeiros interesados en que eso se fixera así e non de xeito escuro e discrecional. As visitas constantes a Arxentina do alcalde teñen máis que ver cos seus intereses particulares que con atender ás necesidades dos emigrantes. Intereses particulares referidos a negocios familiares pero sobre todo a arrincar os votos que lle compensen da caída aquí. Usa o cargo de alcalde nos distintos actos oficiais para pedir o voto polo PP a cambio da axuda que leva e das comidas que paga, como vostede sabe.

5º O conflicto do IBI na Estrada xerouno o propio alcalde ao asinar unha ponéncia de valores erróneos e impedir realizar a súa corrección ata o momento. As consecuencias son a suba desproporcionada do imposto diante do que a xente ten todo o dereito a protestar. Un incidente illado provocado polo propio alcalde non pode ser usado para descalificar unha mobilización pacífica e exemplar que dá conta da dignidade dun pobo que se fartou de resignarse diante das cacicadas. O comportamento cívico non é calar e lavarse as mans diante da inxustiza. Comportamento cívico é, pola contra, defender a liberdade de expresión e manifestación. A imputación de acusacións como a que vostedes fan só pode responder ao interese de calificar como delictiva a nosa conducta (ameazas e agresións) para así poder prohibila e castigar a nosa discrepancia. ¿Eso sería o que vostede entende por civismo?

6º O BNG está orgulloso dos veciños e veciñas que se rebelan contra a prepotencia e a desvergonza deste alcalde e reclaman unha solución colectiva a este problema. Os estradenses da diáspora que defendan a honestidade e a xustiza tamén se deberían sentir orgullosos deles. Outrora os emigrantes a través das Sociedades de Instrucción e da súa participación no agrarismo (Alonso Ríos) e na política (Suárez Pícallo) combateron o caciquismo e a incultura. As remesas de emigrantes financiaron un xornal estradense anti-caciquil como foi “El Emigrado” e a súa entidade promoveu a re-edición dun libro do escritor galeguista Ken Keirades, que estaba a ser represaliado pola dictadura no 1952.

Nós sentímonos orgullosos dos emigrantes, de todo o que fixeron e de todo o que lle queda por facer. Por iso resúltanos indignante que sexan usados como graneiro de votos e non tratados como persoas que tanto deron pola nosa Terra e que merecen o noso respecto e consideración. Se vostede obra en función do seu cargo societario e non da súa militancia partidaria, debería facilitar tamén a nosa información aos membros da súa entidade e non só a do PP. Para isto teñen a sua disposición a nosa páxina web (www.benega.info/aestrada), e mesmo estaríamos dispostos a remitirlle a documentación que precisaran. Nese sentido poñémonos ao seu servicio.