Sábado 22 de Xaneiro de 2005 - 17:02
O BNG presenta unha moción, que se discutirá no próximo pleno, no que demanda que se melloren e amplíen as zonas deportivas do noso Concello, como por exemplo a reconstrucción da pista de atletismo do campo de futbol da Baiuca; tamén solicita nesta moción que se mellore o acceso ás citadas instalacións, así como a adecuación das mesmas para que se poida desenvolver unha actividade deportiva con seguridade e comodidade para os/as usuarios/as. Na sociedade actual, unha vez satisfeitas para unha porcentaxe importante da poboación as necesidades primarias dos individuos (comida, roupa, vivenda...), demanda unha serie de necesidades diferentes ás que existían hai poucos anos; unha delas consiste no dereito a desenvolver actividades de lecer (como as deportivas ou as culturais) e é ben sabido que o disfrute e/ou práctica da maioría delas leva consigo a tenencia dunha infraestrutura adecuada (entendendo por tal tanto os edificios propiamente ditos, coma outras dotacións asociadas –caso, por exemplo, de aparcamentos ou pistas de acceso-).
No noso concello existe unha zona deportiva que conta cunha gran demanda, (nela realízanse actividades de distinto tipo, tanto por particulares como por colectivos) pero na que se poden atopar algunhas deficiencias que nos parece oportuno revisar, sobre todo tendo en conta que unha gran porcentaxe dos usuarios da mencionada zona son nenos. As melloras que, ao noso xuízo, se poderían levar a cabo son as seguintes actuacións que o Grupo Municipal do BNG propón ó Pleno da Corporación Municipal para a adopción do seguinte ACORDO:
1. Hai pavillóns que non contan cun equipo calefactor adecuado; este feito destaca sobremaneira no antigo frontón e vese agravado por ser un local utilizado para desenvolver algunhas das actividades propostas polas Escolas Deportivas Municipais (Patinaxe, Ximnasia Deportiva...).
2. Solución dos problemas de humidade do antigo frontón (onde se poden atopar charcos de auga sempre que chove).
3. Ampliación e mellora da pista de acceso ao mesmo edificio, xa que é moi estreita (por tramos case non permite que se crucen dous vehículos) e con curvas de moi pouca visibilidade.
4.Adecuación da zona existente entre o Campo de Futbol, as Piscinas e mais as Canchas de Tenis, de xeito que permita ser usado como aparcadoiro e tamén como pista de atletismo.
5. Dotación de puntos de auga potable nas pistas que rodean a zona da carballeira, xa que se utiliza habitualmente (xunto cos terreos mencionados nos parágrafos anteriores) para a práctica do atletismo.
6. Mellora da pista que discorre paralela á Academia de Policía, actualmente con tramos en mal estado, sobre todo na zona máis próxima ás Piscinas.
7. Reconstrucción das Pistas de Atletismo ubicadas no Campo de Futbol da Baiúca. Powered by AkoComment 1.0 beta 2! |
