Luns 09 de Maio de 2005 - 23:10
O Pleno da Corporación Municipal celebrado hoxe luns día 9 de maio, aprobou por unanimidade unha moción do BNG na que se insta ao goberno central do PSOE a retirar o recurso presentado contra a modificacion da ordenanza pola cal se reduciron na Estrada os recibos do IBI.
Como é sabido, o goberno do PSOE, a través do delegado do goberno en Galiza, interpuxo recurso perante o TSXG contra a única solución transitoria que lle quedaba ao Concello para compensar aos propietarios dos inmóbeis do casco urbano pola demostrada e desmesurada sobrevaloración catastral. Esta sobrevaloración recolleuse nun informe técnico pericial que foi avalado pola Comisión Mixta e a Corporación Municipal, pero que a Xerencia Territorial do Catastro nen sequer tivo en conta para comezar a negociar a redución dos valores catastrais. A resposta da Xerencia Territorial do Catastro chegou ao Concello cando este organismo público xa estaba en mans do goberno socialista de Madrid quen, lonxe de querer chegar a un acordo para solucionar o problema, creou un novo ao pór en perigo as reducións conseguidas polos veciños.
A moción quer ser un elemento máis, xunto coas iniciativas que se debaterán no Congreso dos Deputados a instancias dos parlamentarios do BNG en Madrid, para que o goberno central reflexione sobre o asunto, entre na via do diálogo e peche o da xudicialización do conflito, pois esta última non supón máis que pór unha venda diante dos ollos e, de paso, dar paos de cego; unha vía que, pese a ter poucas posibilidade de prosperar pola febleza da argumentación do avogado do Estado, podería reabrir o conflito social que no seu momento se creou na Estrada.
Desde o BNG temos confianza en que no PSOE se pase do talante aos feitos e, coa retirada do recurso xudicial, se poida abrir unha vía de negociación para darlle unha solución definitiva ao problema, que pasaría por facer unha revisión dos valores catastrais axustados aos valores reais de mercado e unha descentralización da xestión catastral, para que cada comunidade autónoma aplique criterios catastrais acaídos á súa realidade urbanística. E mentres tanto, os veciños teñen que ver repercutido nos seus recibos a compensación pola sobrevaloración demostrada.
A este respecto, o BNG quer trasmitirlle a todos os propietarios de bens inmóbeis do casco urbano da Estrada que, se ben a mobilización veciñal e cos únicos votos do BNG conseguiuse que os recibos do ano pasado viñesen coa redución aprobada, esta é unha solución provisoria --sobre a que pende a ameaza du contencioso administrativo-- e que, para garantiren que a redución continúe até que se chegue a unha solución definitiva, deben exixirlle a quen creou o problema (o PP) e quen o quere xudicializar (PSOE) que no canto de ser obstáculos para arranxalo, dean alternativas para solucionalo. Powered by AkoComment 1.0 beta 2! |
