Luns 06 de Xuño de 2005 - 22:18
O Goberno do PSOE non comparte o sentir maioritario dos Estradenses de que existe sobrevaloración catastral xeraliza e, pola contra, suxire que existe infravaloración, nunha resposta por escrito do Ministerio da Presidencia á deputada do BNG no Congreso dos Deputados, Olaia Fernández Davila.
Nas súas respostas, o goberno central elude explicar os motivos que o levaron a presentar un recurso contencioso administrativo, e non se mostra disposto a retiralo –tal e como solicitou por unanimidade a Corporación Municipal da Estrada— nen se pronuncia sobre a suba do 60% no recibo do IBI nun ano. Todas as respostas resultan evasivas, e reafirman a conformidade do executivo socialista coa actuación da Xerencia Territorial do Catastro durante estes últimos 9 anos e subliñan a “bondade” da actual Ponencia de Valores.
Para o BNG, aínda por esperadas, resultan decepcionantes as respostas do goberno socialista, as cales mostran unha perfecta sintonía co comportamento que o anterior goberno do PP tivera co tema, e coinciden coa sintonía entre o PP e o PSOE a nivel local.
A falta de alternativas, a negativa a negociar o conflito ou a provocación de suxerir que no canto de sobrevaloración existe infravaloración dos valores catastrais da vila da Estrada, transloce, alén dunha falta de compromiso –dun goberno que se di progresista— cun aspecto de carácter tan social como este, un total descoñecemento da realidade e os problemas da Estrada.
As respostas están moi en consonancia coa negativa do PSOE e do PP de transferir ás Comunidade Autónomas a xestión do Catastro e responden á concepción centralista que ambos partidos teñen do Estado.
Tras estas respostas, o BNG considera que se tramite urxentemente o acordo da Comisión Mixta de contratar un estudo previo a unha nova Ponencia de valores, tramitación que o Alcalde da Estrada ten paralizada. Powered by AkoComment 1.0 beta 2! |
