Martes 21 de Marzo de 2006 - 12:54
A deputada Modesta Riobó presenta unha iniciativa parlamentar para aumentar a atención nas especialidades existentes con listas de espera
O grupo parlamentar do BNG, a través da súa deputada Modesta Riobó, vén de reclamar medidas para aumentar a atención nas especialidades que teñen lista de espera no Centro de Asistencia Primaria do concello de A Estrada, así como a dotación de especialidades necesarias e das que non dispoñen na actualidade.
A deputada nacionalista presentou unha iniciativa parlamentar na que advirte de que, a pesar de tratarse dun centro que atende a unha poboación de 22.300 habitantes, existen unha serie de deficiencias, tales como a falta de asiduidade coa que traballan algunhas das especialidades ou servizos ou a asignación de profesionais non fixos para as mesmas, que favorecen a inestabilidade e discontinuidade no seguimento dos pacientes. A parlamentar do BNG tamén se fai eco no texto da súa iniciativa de que as listas de espera, por exemplo en oftalmoloxía, son de até tres meses e falta un lugar específico e adecuado para a realización de ecografías, chegando incluso os profesionais encargados de levalas a cabo de pretender deixar de ofrecer este servizo.
Por outra parte, Modesta Riobó tamén criticou a non informatización do servizo de laboratorio. “Esta situación –dixo- obriga a que todos os días unha persoa se encargue de escribir á man o libro de rexistro onde se recollen todas as probas realizadas cada día no mesmo centro e tamén as probas realizadas nos demais centros periféricos do rural”.
Ao respeito do laboratorio, a deputada dixo que cumpre dotalo de maquinaria suficiente para o volume de probas a realizar e lamenta as dificultades que está habendo para cambiala por outra apropiada “ao estar en dúbida a continuidade deste servizo”.
Ante o exposto, Modesta Riobó quer saber como pensa a Consellaría de Sanidade dar solución a estas situacións “que están a causar malestar e desmotivación entre os profesionais” e cal é a previsión da continuidade do Servizo de Laboratorio, así como a súa informatización e dotación adecuada á demanda existente. Powered by AkoComment 1.0 beta 2! |
