Xoves 20 de Xullo de 2006 - 12:35
O vicepresidente da Xunta, Anxo Quintana, presidiu onte en Sabucedo a primeira reunión da Comisión Interdepartamental do Proxecto Integral de revitalización deste núcleo pertencente ao noso Concello. Na xuntanza tamén participaron a conselleira de Vivenda e Solo, Teresa Táboas; tamén estiveron presentes membros da Asociación Rapa das Bestas, así como Emilio Quintillán de Xestur de Pontevedra, da Dirección Xeral de Patrimonio e os delegados provinciais da Consellarías de Innovación e Industria, Montse Prado e Gonzalo Constenla de Medio Rural.
A Comisión ten como obxectivo primordial coordinar e promover un conxunto de iniciativas para favorecer o desenvolvemento integral do lugar de Sabucedo. Segundo manifestou Anxo Quintana, o proxecto baséase en accións de valorización e conservación do patrimonio histórico, artístico e habitacional, como exemplo de arquitectura tradicional; a promoción cultural e turística do núcleo; e a dinamización económica e social a partir dun proxecto de desenvolvemento agrario, gandeiro e forestal. O vicepresidente da Xunta explicou que este é un "auténtico proxecto de desenvolvemento integral para Sabucedo". Quintana anunciou ademais que xa está encargado o proxecto de execución para a creación do centro de interpretación de Sabucedo e comprometeu tamén un "apoio especial" para a celebración da Rapa das Bestas do vindeiro ano. Para Anxo Quintana é importante facer realizacións e ofrecer axudas "de presente para que as nosas propostas de futuro teñan máis fiabilidade e xeren maior confianza en todos e en todas", apuntou.
Anxo Quintana lembrou que para que este tipo de proxectos de desenvolvemento e dinamización triunfen é necesario crear una marca de identidade. Nesta liña, destacou que no proxecto de Sabucedo "xa se empeza con moito andado", porque os veciños lograron crear unha marca de garantía: a Rapa das Bestas, que é coñecida e valorada no eido autonómico, nacional e internacional.
Segundo indicou o vicepresidente, ata o de agora existía unha "disociación", xa que moita xente emprendedora e preocupada por promover o desenvolvemento dos seus pobos e vilas atopábase cunha Administración "renqueante" que só ofrecía apoios puntuais. Esta situación, segundo apuntou Quintana, está a cambiar porque "hai que traballar codo con codo".
Proxecto técnico
Nesta primeira xuntanza, os asistentes abordaron a situación actual do municipio e os proxectos nos que traballa o concello e a Asociación Rapa das Bestas para promover a dinamización de Sabucedo. A Consellería de Vivenda e Solo quedou encargada de crear un equipo técnico para redactar o proxecto integral, en colaboración coa asociación de veciños e co concello da Estrada. Está previsto que antes de finais de ano se redacte o primeiro borrador, que deberá ser aprobado inicialmente pola Comisión antes das aprobacións administrativas definitivas que debe ter o proxecto en cada un dos seus eidos: local e autonómico. Powered by AkoComment 1.0 beta 2! |
