O Pleno aprobou por unanimidade unha proposta de declaración institucional feita polo BNG co gallo da celebración o 25 de novembro Día Internacional da Eliminación da Violencia contra as Mulleres

Con esta declaración que o concello fará pública ese día, comprométese traballar na prevención da violencia contra as mulleres, poñendo en marcha actuacións que evidencien que a raíz deste problema está nas relacións de poder históricamente desiguais entre homes e mulleres. Tamén compromete ao Concello a promover actuacións que conduzan ao afortalamento da independencia económica, política e social das mulleres.

O 25 de novembro foi declarado pola Asemblea Xeral das Nacións Unidas como o Día Internacional da Eliminación da Violencia contra as Mulleres, co obxectivo de implicar aos gobernos e ao conxunto de organizacións de carácter social na sensibilización a respecto do grave problema que constitúe a violencia de xénero.

É pois, unha data para a denuncia, de concienciación social, mais tamén un día para propiciar a reflexión e o compromiso de toda a sociedade galega sobre a violencia que se exerce contra as mulleres polo simple feito de ser mulleres.

Os cambios e avances no tratamento legal da violencia de xénero son pasos necesarios para loitar contra este fenómeno. Por iso queremos expresar hoxe, o apoio desta corporación municipal á iniciativa posta en marcha pola Vicepresidencia da Igualdade e do Benestar da Xunta de Galiza, de dotar ao noso país dunha Lei Galega para a Prevención e Tratamento Integral da Violencia de Xénero. Esperando que a súa aprobación e desenvolvemento contribúa dunha maneira efectiva a diminuír e erradicar a persistencia da violencia no ámbito galego.

As cifras de denuncias e mulleres asasinadas que se repiten ano tras ano, poñen de manifesto dunha maneira brutal, que non podemos baixar a garda, e que se fai imprescindíbel a implicación de todas as institucións, asociacións e persoas na súa erradicación. Sabemos que nos enfrontamos a un problema estrutural, pero este feito non pode converterse nunha escusa para non actuar.

Cómpre unha implicación de todas as administracións no desenvolvemento de actuacións encamiñadas a previr e paliar esta situación. Debemos camiñar cara o compromiso de todos os homes e mulleres de Galiza para facer visíbel o rexeitamento ante calquera forma de violencia contra as mulleres.

Por todo isto, a corporación municipal da Estrada declara o seu firme compromiso de:

• Traballar na prevención da violencia contra as mulleres, poñendo en marcha actuacións que evidencien que a raíz deste problema está nas relacións de poder históricamente desiguais entre homes e mulleres.

• Promover actuacións que conduzan ao afortalamento da independencia económica, política e social das mulleres.

• Colaborar con outras institucións nas políticas destinadas a prestar atención ás vítimas, garantir a súa seguridade e apoiar a súa recuperación.

Escreber Comentario
Nome:	Visitante
Título:
Comentario:

Powered by AkoComment 1.0 beta 2!