O pasado día 1de novembro a páxina web do BNG da Estrada sufriu unha maré de visitas,que continuou durante os días seguintes, referidas na súa meirande parte desde unha páxina web de extrema dereita (Infonacional.com). O obxectivo non era outro que o de boicotear a enquisa desde a que se pretendía recabar a opinión de veciñas e veciños sobre a conveniencia de retirar o rueiro fascista do noso Concello, cuestión que até ese día era amplamente apoiada, pero que por mor dese boicot o resultado agora mesmo é negativo á retirada do rueiro fascista.

Ao BNG non lle resulta estraño que grupos fascistas prefiran que na Estrada sigamos a ter Rúas como nome do Martínez Anido, Calvo Sotelo, ... O que nos chama a atención é a coincidencia de criterios que ten un partido democrático como o PP con grupos de extrema dereita á hora de manter en moitos concellos do País, e no noso en particular, nomes de rúas e símbolos fascistas no canto de adicárllelas aos mártires do noso Concello, entre os que se atopa un alcalde da Estrada, Jesús Ignacio Puente Fontanes, que a día de hoxe non ten nin unha rúa nin unha placa que recorde que el morreu por defender a unha institución democrática da tiranía fascista.

No BNG non temos medo de ameazas e de boicotes de partidos de extrema dereita, e se o PP non quere cambiar o rueiro fascista da Estrada, esta será unha das primeiras medidas que tomará o BNG de acadar o goberno nas vindeiras eleccións locais de 2007.