De concelleiro na oposición a ser parte no goberno da Xunta. Como avalías este paso?

A nivel persoal é un repto moi importante para min, e de grande responsabilidade, pois agora toca poñer en práctica políticas concretas en resposta a problemas concretos. Isto non quere dicir que, antes, cando era concelleiro, as mocións que presentaba o BNG no Pleno non falaran de cuestións concretas, o que pasa é que nos atopabamos cunha parede, a da maioría absoluta do PP dificilmente franqueábel. De todos os xeitos, en algún momento o BNG logrou superar esa parede para dar solución a un problema concreto, como foi o da subida do IBI, solución, que, por outra parte, foi avalada por unha sentenza xudicial, o cal demostra que non estabamos errados e, o que é máis importante, que actuamos con responsabilidade cando nos tocou, cousa que non fixeron outros.

O BNG en pouco máis dun ano puxo en marcha diversos proxectos para A Estrada.

Efectivamente, o BNG desde a Xunta e desde o Concello puxo en marcha proxectos tan importantes como o da Cidade do Moble, que pretende ser un referente modélico na construción de polígonos industriais sectoriais. Tamén asinou, a través da Consellaría de Medio Rural, un convenio de colaboración coa Cooperativa Monte Cabalar, un proxecto este de grande calado, que pretende poñer en valor o noso medio rural na súa totalidade: o monte, a gandaría, a agricultura e tamén o enlazaremos co turismo rural, pois tamén coas outras Consellarías que leva o BNG (Vicepresidencia, Industria, Cultura e Vivenda) realizaremos un proxecto de desenvolvemento integral de Sabucedo, alén das concentracións parcelarias e o apoio ás estruturas e infraestruturas rurais. Iso sen contar co Centro de Día e Residencia de Asistidos e a Galescola que pretende construír a Vicepresidencia que dirixe Anxo Quintana, e que se hoxe non son xa unha realidade é pola incompetencia do PP á hora de poñer os terreos a disposición deste organismo.

Outros en moito máis tempo fixeron moito menos

Eu diría que non fixeron nada para que A Estrada progresase. O PP gobernou 16 anos na Xunta, e vai para outros tantos no Concello. O Sr. Palmou foi Conselleiro e deputado e nunca se lle viu traer ningunha acción de calado para A Estrada, e se as trouxo eran todo papel mollado como denunciamos no seu día. Acórdanse agora, que non gobernan na Xunta, de pedir o que non pediron nin fixeron nunca. Eu coido que os veciños e veciñas da Estrada están sacando boa nota deste comportamento hipócrita e demagóxico do PP, e avaliarán positivamente o traballo feito polo BNG dende a Xunta pero tamén desde aquí, desde o Concello. Se nun ano os nacionalistas nos esforzamos por facer todo o que se leva dito, que non poderemos facer pola Estrada se contamos cunha alcaldesa do BNG que sintonice perfectamente con esta aposta decidida pola Estrada?.

Escreber Comentario
Nome:	Visitante
Título:
Comentario:

Powered by AkoComment 1.0 beta 2!