Sábado 27 de Xaneiro de 2007 - 17:32
Cando o BNG dicía que a incorporación Á Unión Europea que pactou o PSOE e bendeciu o PP en 1986 ía ser lesiva para os nosos intereses agro-gandeiros do noso país non estaba facendo un vaticinio aventurado e oportunista. Cando o BNG hoxe en día está a dicir que o Plan Lácteo que aplica o goberno de Zapatero a Galiza é un lastre para o desenvolvemento do noso principal sector produtivo, a realidade vén a darnos unha vez máis a razón, pois Galiza produce máis leite que a que nos permite a cota que se nos aplica dende a Unión Europea vía Goberno Central, sen posibilidade de poder incrementala. Froito disto, hai unha inxente cantidade de "leite negro", que se produce fóra da cota asignada, e, curiosidades do mercado, este leite volta ao noso país transformado en leite foráneo, cando en realidade é leite galego, leite que producen os nosos gandeiros e gandeiras. Por que non se nos deixa producir o leite que consumimos? Simplemente, porque os sucesivos gobernos centrais do PP e do PSOE non queren que Galiza progrese adecuadamente, malia ás grandes potencialidades que ten o noso país.
O BNG da Estrada, a respecto da detención do Concelleiro do PP, José Luis Barcala, pola súa presunta implicación nunha rede de distribución e comercialización do que se vén en chamar "leite negra", entende que debe presentar a súa dimisión, non xa polo delito cometido (trátase dunha presunta estafa á Facenda Pública) se non ademais por pertencer a un partido, o PP, que por un lado instaurou e permitiu a aplicación das cotas leiteiras no noso país, e pola outra parte acubilla persoas, militantes como é neste caso, que se lucran cos problemas que xeran as cotas do leite.
Evidentemente, no BNG da Estrada, non esperamos que José Luis Barcala teña a honradez de presentar a súa demisión, como tampouco a presentaron outros compañeiros de corporación e de partido implicados nun presunto delito urbanístico, do cal aínda terán que dar contas perante a xustiza. De todos os xeitos, se non o fan, serán os veciños e veciñas da Estrada os que se encarguen de "castigalos" nas vindeiras eleccións municipais, porque ningún pobo se pode permitir o luxo de ter uns representantes, alén de ineficaces, vulneradores da lei. Powered by AkoComment 1.0 beta 2! |
