Obviamente o BNG discrepa do concepto de democracia que ten o PSOE, xa que non pode definirse como democrático ningún proceso no que, con carácter previo á reunión do órgano colexiado que ten que adoptar unha decisión –presumiblemente con criterios obxectivos e cos datos que se van obter no transcurso da mesma-, se estableza un pacto que condicione o voto da maioría dos membros do dito órgano. Que o pacto se estableceu con anterioridade á reunión e, a que os Padronos coñecesen os curriculums a avaliar é un feito corroborado tanto polo Alcalde da Estrada en declaracións públicas e tamén polo Tesoureiro da ACE que critica a “rotura da disciplina de voto” por parte dun dos Padronos.

O BNG acata a decisión do Padroado
Aceptar a decisión do Padroado da Fundación de Exposicións e Congresos da Estrada, é un feito para o BNG, agora ben, isto non impide que como organización política integrante da Corporación do Concello da Estrada (sen representación no Padroado) e como forza política, realicemos a valoración do proceso e llela traslademos á cidadanía estradense, feito que mesmo consideramos a nosa obriga.

Solicitamos do PSOE unha aclaración pública sobre o contido do pacto co PP e o prezo político do mesmo, e na vez disto o PSOE trata de lanzar unha cortina de fume con acusacións insidiosas.

Resulta evidente a toda a cidadanía estradense o apoio á Fundación de Exposicións e Congresos por parte da Consellería de Innovación e Industria, non so economicamente, senón tratando de poñer ao mellor profesional ao fronte da mesma, co obxecto de afortalala e mellorala, cuestión que rexeitaron a maioría dos membros do Padroado escollendo ao candidato con peor curriculum (é unha afirmación obxectiva).

O Sr.Sanmartín dimitiu como membro do Padroado, non por unha cuestión de ética, senón porque estatutariamente é incompatible ser Padrono e Xerente

O BNG na Xunta vólcase coa Estrada
O apoio da Consellería de Innovación e Industria á Estrada, ao seu sector do Moble, e á propia Fundación de Exposicións, non son declaracións de intencións senón feitos:

• No ano 2007 as Consellerías de Innovación e Industria e Vivenda teñen consignados 33,5 millóns de euros para a Cidade do Moble
• Nos anos 2005-2006 a Consellería de Innovación e Industria destinou máis de 226.000 € ao Polígono Industrial de ToedoNo ano 2006 a Concellería de Innovación e Industria destinou 126.00€ á Fundación de exposicións e Congresos

A Consellería de Medio Rural investiu na Estrada máis de 2 millón e medio de euros, a Consellería de Vivenda ofertoulle ao Concello a construción de novas vivendas sociais, A Vicepresidencia da Igualdade e o Benestar ten consignación para a construción da Residencia e do Centro de Día, así coma dunha nova gardería. Estes son datos. Se as Consellerías que están baixo a responsabilidade do PSOE tiveran o mesmo nivel de compromiso coa Estrada, non estaría pechado o Consultorio do Foxo, nin sen corrixir as deficiencias do Centro de Saúde da Estrada, nin en risco o Centro Médico de Codeseda, nin estancada a solución ao Colexio Pérez Viondi, nin os problemas coas infraestruturas viarias, por exemplo.

Por último, non pode demandar o PSOE que na Estrada se acate a vontade maioritaria do Padroado, e ao mesmo tempo se demande que por parte da Consellería de Innovación e Industria se obvien as decisións que os Padroados doutras Fundacións lexitimamente adopten.

Para o BNG o desenvolvemento e medre da Estrada, non pode depender de que no resto do noso país se produza unha parálise, A Estrada conta con potencial suficiente para despuntar por si mesma, agora ben, fai falta unha dirección política que crea nela, actúe en prol dos seus intereses, superando o amiguismo, o caciquismo e os intereses partidarios que abandeiran PP e PSOE.

Escreber Comentario
Nome:	Visitante
Título:
Comentario:

Powered by AkoComment 1.0 beta 2!