O Governo de EEUU, despois de completar a campaña militar en Afganistán, comezou a espallar o seu propósito de atacar a Iraque.

Nas últimas semanas esa intención xa se fixo pública e notória, manifestando ademais que o obxectivo prioritário da acción militar é a de mudar o governo dese Estado, para estabelecer outro que responda aos seus intereses, e facerse co petróleo da zona, de xeito similar ao acontecido en Afganistán.

Aznar e Bush

A actuación de EEUU responde en exclusiva aos seus próprios intereses políticos, económicos e xeoestratéxicos; apostando cada vez máis por unha acción unilateral á marxe da opinión dos Organismos internacionais e dos restantes Estados, que vulneraria as regras que rexen no Direito Internacional desde despois da II Guerra Mundial, e suporia unha desautorización da Organización das Nacións Unidas. Mália a gravidade desta actuación á marxe da comunidade internacional, o Presidente do Governo español xa se apresurou a amosar o seu apoio incondicional e sen matices ás pretensións estadounidenses, denotando unha falta de inciativa política própria para abordar a solución ao contencioso por vias pacíficas, e ao mesmo tempo, aprofundando na submisión e aliñamento no bando máis belicoso e entreguista dos EEUU, xunto a Berlusconi ou Blair.

O posíbel ataque militar de EEUU sobre un Estado soberano como Iraque, sen ter demostrado graves vulneracións ou ameazas por parte dese país ao equilíbrio internacional, e sen contar coa lexitimación da ONU, vén a reforzar o papel estadounidense de garante da orde mundial a fin de manter o seu estatus de primeira poténcia mundial, e de subordinación dos restantes países aos seus intereses. Por iso, pon-se en funcionamento a acción militar sen ter en conta as graves repercusións que terá sobre a populación civil de Iraque, xa moi empobrecida debido a un embargo internacional que dura máis de dez anos, cuxo saldo actual é a morte de centos de miles de seres humanos.

Refineria iraquiana

O BNG, reiterando a sua vontade de colaboración na construción mundial de povos libres e de relacións internacionais baseadas na paz e igualdade, rexeita a inxeréncia que os EEUU pretenden realizar no Iraque de forma violenta, e a sua teimuda política imperialista que atenta contra a soberania das nacións do mundo.
As institucións deben facer-se eco destas reflexións ante a iminéncia das accións militares, e impulsar unha concienciación cidadá que rexeite esta nova agresión militar a Iraque, e apoie o emprego de iniciativas diplomáticas por parte de toda a comunidade internacional no seu conxunto baixo a cobertura da ONU, para procurar dar unha solución pacífica a este conflito na perspectiva de defender a soberania do Iraque face ao poderio militar estadounidense, preservar os direitos humanos e evitar unha confrontación armada que castigue a milleiros de cidadáns inocentes.

Deste xeito o BNG solicita que a Corporación Municipal rexeite publicamente un ataque militar dos EEUU contra Iraque solicitando da mesma que inste ao Congreso dos Deputados e ao Governo do Estado español a:

1 ) Opór-se nos foros e organismos internacionais a un ataque militar de EEUU a Iraque.
2 ) Defender o emprego das iniciativas diplomáticas necesárias por parte da ONU para solventar por vias pacíficas o conflito entre EEUU e Iraque.
3 ) Comunicar aos EEUU a negativa a permitir a utilización das bases situadas en território español ou do espazo aéreo do Estado español dentro dunha campaña de ataque militar a Iraque.

Tamén solicita que participe e apoie institucionalmente os actos convocados para manifestar o rexeitamento social dun ataque militar a Iraque.

Comentarios

mary Escrito por Visitante en 2005-06-15 19:00:29

Escreber Comentario
Nome:	Visitante
Título:
Comentario:

Powered by AkoComment 1.0 beta 2!