Quintana exixiu-lle actuacións ao Ministro de Fomento como "a ubicación da Axéncia de Seguridade Marítima na Galiza, unha mayor separación do corredor de seguridade, unha policia marítima no corredor que exerza un maior control dos buques"

O Ministro de Fomento, Francisco Álvarez Cascos, foi incapaz de oferecer unha resposta concreta e detallada ao Senador do BNG Anxo Quintana sobre as medidas que vai adoptar o Governo español para evitar que se repitan mais catástrofes fronte as costas galegas como a do petroleiro "Prestige", e limitou-se a afirmar que "as actuacións españolas deben estar submetidas ao directo internacional".

Anxo Quintana exixiu-lle ao Ministro de Fomento actuacións para que "non sucedan mais "Urquiolas", "Casóns", "Mar Exeos" e "Prestige´s". Franza logrou que a UE aprobara dous paquetes de medidas urxentes cando sofreu o desastre provocado polo "Erika" fronte á Bretaña. Eiquí, cantos "Prestige" son necesários para que o Governo español estabeleza no ámbito internacional as medidas imprescindíbeis que poñan coto a estas catástrofes que periodicamente padecemos os galegos nas nosas costas".

"Señor Ministro, precisamos medidas de xeito imediato, como o estabelecimento da Axéncia de Seguridade Marítima na Galiza, unha maior separación do corredor de seguridade no Atlántico, a existéncia dunha policia marítima que exerza un maior control e inspeción dos buques que pasan pola nosa costa, a aprobación imediata da obriga de levar o doble casco, a ubicación de meios
anti-contaminación, de Salvamento e Prevención na Galiza. Que ten que pasar xa para que todo isto se aprobe con carácter de urxéncia?", enfatizou o senador do BNG.

Quintana advertiu-lle a Cascos que tal e como están as cousas actualmente, a ameaza de que unha situación así se repita "está aí. Lembro-lle que cada dia pasan 3 petroleiros a menos de 50 millas das costas galegas, e cada ano contabilizan-se 6000 barcos con mercadorias perigosas que navegan polo corredor Atlántico. E que 1 de cada 5 deses buques teñen as mesmas condicións que o fatídico "Prestige". Se nos se adoptan medidas corremos o risco de padecer periodicamente este tipo de catástrofes ecolóxicas, económicas e socias na nosa costa".

Cascos estivo mais preocupado en autoxustificar a actuación do Governo español respeito a este desastre de enormes dimensións e en escudar a falla de iniciativa do Executivo no feito de que "as accións españolas deben estar submetidas ao directo internacional. Debemos arranxa-lo no ámbito da UE".

O senador do BNG denúnciou "a incapacidade do Governo español para influir na UE e no ámbito internacional e facer realidade a adopción de medidas respeito á seguridade marítima".