O sinistro pón en evidéncia, unha vez máis, un problema denunciado polo BNG en reiteradas ocasións. A falla de seguridade nas nosas costas e a caréncia de vontade política, recursos e capacidade de xestión das autoridades centrais e autonómicas para adoitar as medidas preventivas necesárias e responder con celeridade e eficácia diante de situacións de crise.

Asi, temos que denunciar que a actuación das autoridades governativas e dos responsábeis políticos das administracións central e autonómica preocupou-se máis da resposta meiática que da adopción de medidas áxeis e eficaces para aminorar os custes económicos e sociais da catástrofe. Como se preocuparon tamén de buscar “chivos expiatórios” para atribuir culpabilidades externas (que o BNG non nega) en vez de asumir as próprias responsabilidades. Facemo-nos, como o conxunto da sociedade galega, as seguintes preguntas:

¿ Por qué toda a atención estivo centrada en “pasear o problema” en vez de amañá-lo?. O problema non é se petroleiro está xa a 50 ou a 70 millas da costa galega, o problema é que segue a verter fuel, e cada vez en maior cantidade, sen que se adoptasen medidas eficaces. ¿ Pode depender a seguridade dun país da dirección do vento?. ¿ Por que, con todos os precedentes que por desgrácia xa tivo que sofrir o noso país, os meios seguen a evidenciar-se totalmente insuficentes?. ¿ A que se debe a tardanza na chegada de todos os recursos para paliar a magnitude da catástrofe?.

O BNG vai transladar a todos os ámbitos institucionais e sociais nos que ten presenza a defensa das seguintes medidas:

MEDIDAS IMEDIATAS:

• Instar ás institucións e forzas políticas e socias galegas a que afronten o problema na sua verdadeira dimensión, estamos diante dunha catástrofe nacional, diante dun problema nacional galego, non un problema local ou sectorial.

• Instar á Xunta de Galiza a que compareza diante do Parlamento galego para dar explicacións. Convocatória con fal fin dun Pleno Extraordinário do Parlamento Galego no que tamén se discutan propostas de resolución a adoitar pola cámara.

• Exixir a declaración de zona catastrófica para a costa galega.

• Demandar que se arbitren os mecanismos que garantan o pago imediato das subvencións e indemnizacións que deberán contemplar o “lucro cesante”. Isto é, a compensación económica polo custe que para o conxunto da economia de comarcas altamente dependentes da pesca ten o cese temporal desta actividade.

• A depuración imediata das responsabilidades políticas.

PROPOSTAS DE LONGO ALCANCE DO BNG.

• Criación dun corredor para o tráfico de mercadorias perigosas máis separado da costa (salvando os caladoiros de pesca) e prolongación do mesmo en dirección Norte e Sul.

• Criación dunha “policia de vixianza do corredor” dotada dos meios loxísticos necesários para o exercício do seu labor (cobertura por radar de todo o corredor, seguimento do tráfico via satélite, meios de vixianza aérea, etc.) Asunción por parte da Xunta de Galiza das competéncias nesta matéria, asumindo a responsabilidade de dirixir este servizo de prevención.

• Criación dun servizo público de salvamento, loita contra a contaminación mariña e intervención rápida en casos de catástrofe suficientemente dotado fronte á situación actual de dependéncia de servizos privados.

• Exixir da Unión Europea e do Estado español a dotación económica necesária para a posta en marcha destes servizos.

• Ubicación na Galiza da Axéncia de Seguridade Marítima Europea.

• Redución da moratória para o desguace de buques monocasco ao ano 2005. Mellora dos servizos de inspección co obxecto de garantir un control rigoroso dos buques para asegurar que se axeiten ás normas internacionais e comunitárias de seguridade marítima.

O BNG decidiu a criación dun gabinete de crise permanente, integrado por membros da sua Executiva Nacional, representantes nos distintos ámbitos institucionais e expertos en pesca e seguridade marítima. Ao longo desta semana o BNG apresentará iniciativas en todos os ámbitos parlamentares nos que ten presenza e, en contacto cos sectores máis directamente afectados, estudará a pertinéncia de chamar ao conxunto da sociedade galega a mobilizar-se en apoio a estas medidas.