O sinistro do buque Prestige nas costas de Galiza volta a plantexar, unha vez máis, o problema da seguridade marítima, en xeral, e moi en particular, a do tráfico que pasa polos dispositivos de Fisterra. O Governo recoñece que en 2000 foron un total de 733 emerxéncias as que se produciron neste corredor, o maior número de todo o Estado español, segundo resposta ao diputado que subscrebe de 4 de xuño de 2001. nesta mesma resposta se dicia que “se han iniciado los estudios oportunos para la elaboración de un Plan Nacional de Servicios Especiales de Salvamento 2002-2005 cuya línea de trabajo pretende optimizar la cobertura de seguridad mediante una mejora continua de los medios materiales y humanos de la Sociedad Estatal de Salvamento y Seguridad Marítima". Galicia contaba, según el Gobierno, en 2001, con un colectivo humano de 82 personas al servicio de Sasemar y con los siguientes medios marítimos y aéreos a su servicio: buques de salvamento ( 1 de 8780 CV, 1 de 4000 CV, 1 de 2310 CV); embarcaciones de salvamento de 15 m de eslora ( 3); embarcaciones de salvamento de 20 m de eslora (2), helicóptero de salvamento Sikorsky S61N ( 1); embarcaciones de la Cruz Roja (6). Se afirmaba, además, en la respuesta que " se viene realizando un efectivo control de los buques que transitan por el dispositivo de separación de tráfico de Fisterra".

En outra resposta do Governo a pergunta deste deputado, de data 7 de maio de 2001, afirmaba-se que "a propósito de la posibilidad de extender el dispositivo actual de Fisterra, y tomando como base el análisis de los datos de tráfico de buques de tránsito así como de los que navegan en las proximidades, se considera que la ubicación actual del dispositivo, unido a la disponibilidad del sistema de control de tráfico marítimo existente, satisface de manera adecuada la seguridad de la navegación".

Finalmente, a Comisión de Infra-estruturas do Congreso dos Deputados debateu unha Proposición non de Lei do BNG, o 28 de maio de 2001, que foi rexeitada polo PP, na que se pedia que se tomasen medidas para mellorar a seguridade da navegación, a prevención de sinistros e a inspección e control dos buques para que non se produzan infraccións da legalidade, precisamente no corredor de Fisterra.

Desgraciadamente, o sinistro do Prestige pon, unha vez máis, en evidéncia que o dispositivo de separación non é suficiente, no caso de mercancias perigosas, que os controis sobre os barcos non son eficientes nen en porto nen en tránsito, que os meios marítimos e aéreos distan moito de ser suficientes e adecuados para encarar situacións de risco ou combater as ameazas da contaminación, no caso de Galiza. Todo isto agrava-se coas condicións de falla de seguridade dunha frota envellecida, con tripulacións sen preparación e sobreexplotadas e coa primacía de criterios economicistas nas compañias armadoras e nas petroleiras.

Creemos que son xa excesivos os casos gravísimos de contaminación por hidrocarburos, que situan a Galiza no número un do ranking mundial de sinistros destas características. Non se pode seguir mantendo unha atitude tan compracente como a que amosa o Governo nas suas respostas, mentres a realidade encarrega-se de demostrar de forma dramática e tráxica o contrário.

PROPOSICIÓN NON DE LEI

O Congreso dos Deputados insta ao Governo a:

1.- Informar a esta Cámara, no menor prazo posíbel, das causas que provocaron o sinistro do petroleiro Prestige nas costas galegas, as suas consecuencias para o ecosistema e do funcionamento e adecuación dos meios materiais e humanos de Sasemar nas labores de prevención, control, salvamento e loita contra a contaminación neste caso.

2.- Estabelecer un control e inspección adecuadas tanto sobre os barcos que recalan en portos galegos como sobre os que transitan polo dispositivo de separación de Fisterra, para segurar o cumprimento das condicións de seguridade, especialmente no referido ao transporte de mercancias perigosas, asi como o cumprimento das normas medioambientais nas suas actividades de limpeza.

3.- Mellorar, dentro do Plano 2002-2005, a seguridade do tráfico marítimo na zona coa dotación de máis meios materiais e humanos á Sociedade estatal de Salvamento Marítimo, para poder realizar debidamente as labores de prevención e de control, ademáis das de salvamento e loita contra a contaminación.

4.- Mellorar non só o troco de información se non tamén a coordinación entre o centro zonal de Fisterra e o centro de control de tráfico (CROSS) en Francia e o respeitivo centro de Portugal, para lograr un control adecuado de todo o tráfico marítimo no corredor, espécialmente o de mercancias perigosas.

5.- Estabelecer un organigrama de Salvamento Marítimo en Galiza, no que a coordinación dos meios da Xunta e da Dirección Xeral da Mariña Mercante e os organismos encarregados das previsions metereolóxicas sexa eficiente.

6.- Estudar un maior alonxamento do dispositivo de separación de tráfico nas costas de Galiza, especialmente para os buques con mercancias perigosas, e lograr un control real do tráfico, de forma que se poda aplicar unha política realmente preventiva.

7.- Actuar dilixentemente á hora de reparar e indemnizar por danos provocados polo sinistro do Prestige, de forma que non se volte a repetir a conceición de que a Administración do Estado é unha parte máis, sen maiores compromisos e responsabilidades, implicada nas consecuencias da catástrofe, como ocorreu con anteriores catástrofes.