O Bloque Nacionalista Galego solicitou que comparezan no Congreso, en Comisión, cinco ministros e o vicepresidente primeiro do Governo Aznar para que dean conta da sua xestión perante o sinistro do "Prestige".

Os ministros son o de Agricultura, Pesca e Alimentación, para explicar as liñas de axuda previstas para o sector afectado; a de Asuntos Exteriores, para dar conta das iniciativas que vai adoptar a nível internacional para evitar situacións semellantes no futuro; o de Meio Ambiente, para informar sobre as accións do seu departamento respeito do desastre; e os de Facenda e Traballo, para avaliar as consecuéncias para Galiza que decorran do sinistro e dar a coñecer á Cámara sobre as medidas sociais e económicas que se pensa implementar para combaté-las.

"Non imos tolerar que o sinistro se salde sen que se depuren as responsabilidades políticas. O Governo actuou de maneira caótica, por veces neglixente, e sempre sobre a base de non ter tomado no pasado as suficientes medidas preventivas para que non sucedese o que tristemente aconteceu", afirma Francisco Rodríguez.

Na opinión do portavoz do BNG, o Governo cometeria un erro político se se acubillar na autocomplacéncia e na máis absoluta falta de autocrítica: "O que non é sustentábel é que se nos veña dicer que aquí todo funcionou ás mil marabillas e que non existen caréncias de meios materiais e humanos para enfrentar unha traxédia destas dimensións".