"Vimos sostendo desde praticamente o comezo dos acontecimentos que na forma de xestionar a crise, o Governo incorreu en graves responsabilidades políticas. Delas ten que dar conta na instáncia parlamentar o seu Presidente e non o fixo ainda perante o Pleno da Cámara", afirma o portavoz do BNG no Congreso dos Deputados, Francisco Rodríguez.

"Con independéncia da marcha das investigacións desta Comisión, o BNG considera que a actuación dos tres Ministros con competéncias na matéria ten sido tan desafortunada e neglixente, e que o sinistro deberia ter-se saldado xa coa demisión ou cesamento dos titulares de Fomento, Francisco Álvarez Cascos, de Agricultura e Pesca, Miguel Arias Cañete, e de Meio Ambiente, Jaume Matas".

Rodríguez explica que "non é concebíbel que coa indixéncia de meios materiais e humanos cos que a Administración do Estado ten enfrentado, primeiro o salvamento do "Prestige", e segundo, o combate contra a contaminación, non só non teña habido nengún cesamento senón que mesmo con arrogáncia o Ministro de Fomento teña dito que os meios non fallaron, e que o problema está en que "nos enfrontabamos ao reto da natureza".