Sábado 21 de Decembro de 2002 - 00:00
Na pasada lexislatura municipal, a Xeréncia do Catastro, co consentimento do alcalde por meio da sua sinatura, procedeu a actualizar os valores catastrais da Estrada, o cal deu como resultado unha proposta chea de erros e cantidades desproporcionadas. A cidadania, indignada polos custes que tal despropósito lles suporia, mobilizou-se en torno a unha Plataforma Cidadá que conseguiu que o governo municipal dé-se marcha atrás e, polo menos, só se aplicase o coeficiente do 0,25% nos recibos do IBI mentres non se procedese a variar a Ponéncia de Valores axustada aos verdadeiros valores de mercado e se correxisen os numerosos erros que contiña e contén. Sen embargo, o governo municipal non cumpriu a encomenda
e compromiso adquiridos no correspondente Pleno da Corporación
Municipal e chegados a estas alturas do ano 2002, xa case
entrados no 2003, os valores catastrais non se modificaron,
os erros persisten, os recibos do próximo ano 2003
subirán un 60% e, para colmo, a oficina do ORAL
está-lle remitindo aos viciños que reclamaron
os valores perante o Tribunal Económico-Social,
sen que a sua reclamación sexa contestada, os recibos
cos atrasos correspondentes a todos os anos posteriores
á reclamación, coa única intención
de recadar as cantidades que poderian prescribir e sen
que se dean explicacións ou contestacións
a tais reclamacións.
Esta actitude da Xeréncia do Catastro e mais do
ORAL non é sorprendente por reiterada no que se
refere á sua actitude escurantista e falta de respeito
cara aos viciños da Estrada e da Plataforma Cidadá
contra a suba de Impostos e agora proceden a dar un novo
paso no seu afán recadatório sen dar unha
mínima resposta debida ás reclamacións
apresentadas, que non sempre se basearon nos valores aplicados
senón en moitos erros materiais (superfície,
ubicación, clasificación, etc).
A estas circunstáncias soma-se ademais o desleixo
do governo municipal, inicialmente resposábel de
todos estes problemas por dar o seu visto e prace á
Ponéncia de Valores sen ter consultado ao Pleno
da Corporación Municipal, e a partir de aquel momento
por non dar un só paso para arranxar o problema
e só acordar-se do asunto tarde, mal e arrasto,
xa cando o inminente suba do tipo impositivo antes referido
se fai irreversíbel e que traerá como consecuéncia
que, se non se toman as medidas oportunas, os estradenses
propietários de bens inmóbeis vexan acrescentados
os seus recibos nun 60% no xa próximo 2003.
Perante esta situación, o BNG considera que a
Corporación Municipal debe tomar a iniciativa e
debater e aprobar as oportunas medidas que axuden a resolver
a situación, motivo polo que solicita a toma en
consideración, debate e aprobación das seguintes
propostas:
1) Dirixir-se á Xeréncia Territorial do
Catastro e ao ORAL, exixindo-lles a imediata retirada
dos recibos enviados aos estradenses cos atrasos correspondentes
aos anos desde que apresentaron as suas reclamacións,
mentres non se lles dea unha contestación razoada
aos seus argumentos.
2) Introducir nos Orzamentos municipais para o ano 2003
unha partida destinada a abrir unha liña de subvencións
a todos os estradenses afectados pola suba do recibo do
IBI nun 60% no próximo ano, destinado a resarci-los
de dita suba nunha cantidade igual á mesma, xustificábel
mediante a apresentación das correspondentes facturas
que acrediten calquera obra de reforma, acondicionamento
ou mellora do inmóbel afectado por dita suba, mantendo-se
esta medida até que non se elabore unha nova Ponéncia
de Valores axustada á clasificación real
e valores de mercado de todos os Inmóbeis da Estrada.
Powered by AkoComment 1.0 beta 2! |
