O Alcalde colecciona xuizos como que quen colecciona selos. Un viciño do Concello de Vedra, pero con propiedas no noso Concello, apresentou unha querela criminal contra Ramón Campos. Acusa ao Concello e en particular ao noso Alcalde de ter promovido unha invasión da sua propiedade na parróquia de Arnois, e terlle causado estragos na mesma.

Onte xoves día 10, o Alcalde compareceu de novo como imputado perante o xulgado estradense tras ser apresentada unha nova querela criminal contra a súa persoa. O motivo de dita querela é que o particular acusa ao Concello, e en particular ao Alcalde, de ter promovido unha invasión da súa propriedade, na parroquia de Arnois, e terlle causado estragos na mesma. Este caso fora tratado no Pleno da Corporación celebrado en setembro do pasado ano, no que o Grupo Municipal do BNG lle pedira explicacións ao Grupo de Governo por estas accións e lle recriminara o feito de non lle ter dado aclaracións sobre ditos feitos ao viciño, tras terllas pedido reiteradamente.

Agora, a arrogancia e prepoténcia da que fai gala o sr. Alcalde, que o leva a actuar de forma que semella que el non tivese que acatar a Lei e os máis elementais preceptos do procedemento administrativo, trae como resultado esta nova querela e a consecuente posta en evidéncia e falla de credibilidade democrática da sua persoa. A este respecto, cumpre lembrar que o demandante lle fixo saber a Ramón Campos en reiteradas ocasións que só esperaba unha resposta aos feitos e que o único que conseguiu foi que o alcalde, como fai con moitos outros viciños que demandas solucións aos seus problemas, o bota-se das dependencias municipais con malos modos, visto o cal, o particular decidiu actuar penalmente contra o Alcalde por invasión e estragos na súa propiedade.

Ao fío de todo o escándalo que se está xenerando no noso Concello coas reiteradas denúncias e senténcias firmes polas ilegalidades urbanísticas cometidas polo Alcalde e o seu grupo de governo, o Grupo Municipal do BNG tamén quixera subliñar a desfachatez coa que o sr. Alcalde intenta escurrir o vulto no caso da senténcia da rúa IRYDA, unha ilegalidade urbanística máis cometida polo Partido Popular.

Desde o BNG tamén concordamos en que se debería chegar a un acordo que evite o derrube pero, desde logo, o governo municipal non pode lavar as mans como se non fose con el, pois foi o culpábel de que se chegase a esta situación. Por tanto, é o propio grupo de governo, co alcalde ao fronte, quen ten que chegar a ese acordo coas duas partes porque, de non ser así, toda a responsabilidade, tanto penal como económica recaería en que cometeu a ilegalidade, arquivando o expedente de disciplina urbanística, isto é o sr. Alcalde e demáis membros da Comisión de Governo. Tratar de facer esquecer o asunto e evitar a responsabilidade no tema xa se sabe a onde lles pode levar de novo: aos tribunais penais.