O BNG presentou no pleno de onte unha moción urxente no que se rexeitan os bombardeos e a invasión levados a cabo por Israel. A moción aprobada cos votos favorábeis do BNG e do PSOE, (o PP e CIDEGÁ votaron en contra da mesma, solicita do goberno español que suspenda as relacións diplomáticas e económicas co Estado de Israel até que non se poña fin á agresión militar, invasión e blocaxe que está perpetrar na franxa de Gaza, en Palestina.

Alén disto, coa aprobación da moción aprobouse o apoio do Concello da Estrada á concentración convocada polo colectivo “A Estrada por Palestina”, que se levará a cabo este sábado 10 de xaneiro ás 20:30 horas, na Praza da Constitución da Estrada. Ao mesmo tempo o Concello da Estrada tamén apoia a manifestación convocada en apoio ao pobo Palestino do domingo 18 de xaneiro en Santiago de Compostela. Coa aprobación da moción o Concello fará un chamamento á participación dos veciños e veciñas das Estrada en ambas as dúas mobilizacións.

Desde xaneiro de 2006 Israel somete á franxa de Gaza, onde viven un millón e medio de persoas, a un feroz bloqueo económico, que se viu incrementado nas últimas semanas impedindo a achega de calquera tipo de axuda humanitaria, imprescindíbel para a subsistencia da poboación palestina de Gaza.

O 27 de decembro de 2008, Israel decide unilateralmente apretar a corda e esganar aínda máis ao pobo palestino, e decide, co beneplácito dos Estados Unidos e/ou a pasividade da Comunidade Internacional e a ONU, bombardear a franxa de Gaza, producindo máis de 500 mortos e 2.500 feridos, boa parte deles nenos e nenas de curta idade. O 4 de xaneiro Israel invade Gaza e as consecuencias para a subsistencia física do pobo palestino en xeral e do preto dun millón e medio de palestinos en particular que viven en Gaza, é unha incógnita.

Diante desta situación o BNG da Estrada e Galiza Nova fan un chamamento aos veciños e veciñas da Estrada a acudir á concentración para parar o xenocicio perpetrado polo estado de Israel contra o pobo palestino. Esta concentración levarase a cabo o vindeiro sábado 10 de xaneiro, ás 20:30 horas, diante do Concello. Lerase un manifesto e posteriormente lanzaremos zapatos contra os tanques de Israel que bombardean a faixa de Gaza.

O BNG da Estrada, a través da Primeira Tenente de Alcalde, Raquel López, acaba de dar a coñecer as obras e inversións que se farán na Estrada con cargo á dotación do goberno central para remontar a crise económica, e que no noso Concello elévase esta a 3.800.000 euros. Este importe súmase as inversións da Consellaría de Medio Rural no rural da Estrada, que só nun ano aportou 5.000.000 de euros.

As obras que fará o BNG dende o goberno municipal serán as seguintes:

• Proxecto de mantemento e limpeza de beiravías , gabias e tageas en viais de titularidade municipal da zona sur-este do concello, incluída a reposición de tubos (importe aproximado 175.000€)
• Proxecto de e limpeza de beiravías , gabias e tageas incluída a reposición de tubos, e mantemento en viais de titularidade municipal da zona norte-oeste do concello, (importe aproximado 175.000€)
• Beirarrúas de Ouzande en 1.630 metros (importe aproximado 220.000€)
• Arranxo do Albergue Turístico de Sabucedo -supresión de barreiras arquitectónicas e mellora interior para adecuación á normativa sectorial-, (importe aproximado 150.000€)
• Mellora de presas de rega en Tabeirós, Lamas e Arnois (importe aproximado 250.000€)
• Reposición da Ponte de Barbude sobre o Liñares (área recreativa)
• Acondicionamento de viais no rural (asfaltados ou formigonados)

Actuacións en materia de Deportes:

• Pistas de Atletismo da Baiuca
• Renovación firme das Pistas de Tenis Municipais
• Reforma da Cuberta do Frontón e renovación do firme
• Acondicionamento da zona deportiva

Actuacións en Edificios Municipais:

• Rehabilitación da "Casa do Pobo"
• Rehabilitación das Escolas Unitarias de Requián (Frades), Aguións, Sto. André de Vea e S. Xiao de Vea.

O Delegado Provincial da Consellaría de Medio Rural, Gonzalo Constenla, fíxolle entrega hoxe á Primeira Tenente de Alcalde e Concelleira de Medio Rural, Raquel López Doce, dun tractor desbrozador valorado en 80.000 euros, que sumarase á maquinaria que para este fin ten o Concello da Estrada.

O BNG recomendou ao PSOE e ao alcalde Dono "que escoiten aos veciños e veciñas da Estrada e actúen con responsabilidade e madurez política" para cumprir co mandato dos estradenses que nas pasadas eleccións apoiaron "un goberno de coalición estábel que resolva os problemas da Estrada". Segundo o responsábel local do BNG, Xose Manuel Baños, "o BNG ten claro que os veciños e veciñas que apoiaron nas eleccións ao PSOE e ao BNG fixérono porque queren unha transformación na Estrada e un goberno que goberne en lugar de facer ruído e dar espectáculos deplorábeis".

O BNG, cando asinou hai un ano o pacto de goberno co PSOE para conformar un goberno estábel, asumiu que "dotar á Estrada dun Plan Xeral de Ordenación Municipal" ía "ser a tarefa básica do novo goberno", porque "actualmente o principal problema co que se atopa A Estrada é a falta dun proxecto de desenvolvemento urbanístico acorde coas necesidades socio-económicas do concello que potencie os seus sectores produtivos e potencie a actividade construtiva fortemente prexudicada polos anos de paralización de licenzas municipais de construción e actualmente polo encorsetamento ao que nos someten as Normas Provisionais da Xunta de Galiza que impide a ampliación do casco urbano, a edificación na zona rural e dificulta o desenvolvemento de solo industrial".

O 8 de outubro de 2007 o BNG entrou a formar parte do goberno municipal responsabilizándose das áreas de Medio Rural, Facenda, Deporte, Turismo e Participación Cidadá. En 12 meses o BNG no goberno municipal, a través da Primeira Tenente de Alcalde, Raquel López Doce, e dos Concelleiros, Maribel Ruíz Ferro e Xan Carlos Castro Blanco, foi quen de marcar un antes e un despois na xestión nas áreas citadas anteriormente.

Os próximos 18 e 19 de outubro a Marcha Mundial das Mulleres, rede feminista internacional que agrupa a mulleres de máis de 150 países, dará un paso máis na súa loita contra a pobreza e a violencia. Delegadas dos cinco continentes acudirán a Vigo para celebrar o VII Encontro Internacional, nunhas xornadas cargadas de reflexión para seguir construíndo un mundo onde sexan erradicadas a pobreza e a violencia. Todas as persoas, mulleres e homes, e colectivos, que comparten estes dous obxectivos, teñen un convite para acompañar as mulleres vindas dos cinco continentes a dar este paso na cidade de Vigo.

A día de hoxe, e logo de que rematara o prazo de presentación de emendas, así como a resolución das mesmas por parte da Instituto Galego de Vivenda e Solo, dependente da Consellaría de Vivenda e Solo, Augas de Galicia ten pendente de remisión o correspondente informe sectorial, que se adxuntará á Memoria Ambiental, que tamén ditaminará a Consellaría de Medio Ambiente.

O BNG da Estrada saíu ao paso das críticas vertidas contra os nacionalistas polo alcalde Dono e o ex –alcalde Tallón nos últimos días. O responsábel local do BNG, Xose Manuel Baños, animou aos socialistas a guiarse pola "responsabilidade e madurez política" e fixo un chamamento ao alcalde para que "aposte e traballe pola unidade do goberno en lugar de tentar crear división e enfrontamentos gratuitos e inxustificados que poden perxudicar aos estradenses".